Boss o Banwaan? An Desperadong Paglayas kan Ako Bicol sa Anino ni Zaldy Co

SIMPLENG DUON

Ni: Nel Adtoon

Putol na so boot an gabos na koneksyon kan Ako Bicol party-list sa dating Rep. Elizaldy Co mantang padagos an paghahanap kan mga ahensya kan gobyerno sa saiya huli sa mga alegasyon nin "budget insertions" asin mga anomalya sa flood control projects, pirang bulan pakalihis kan pagluwas kaini sa nasyon.

Pirit nang pinagdudoonan kan Ako Bicol Partylist na isiblag an saindang sadiri sa saindang chairman na si Zaldy Co, na naghali sa Pilipinas kan Hunyo bago pa man nagluwas sa publiko an mga kontrobersya. Kinumpirma ni Party-list Vice Chair asin Rep. Alfredo Garbin na nag-resign na si Co sa gabos niyang pwesto sa grupo, kaiba na an saiyang pwesto sa Kongreso, pagigin miyembro kan party board, asin sa gabos na opisyal na rekord sa Commission on Elections (COMELEC).

Sa arog kaining seste nahahaman sa sakuyang isip an sarong kahapotan na:

Kaya daw nindang ipagkanulo an saindang "boss'" para sa hustisya, o sadyang naglilinig sana sinda nin bado tanganing makaligtas sa masunod na eleksyon?

Sa sarong interview ni Pinky Webb sa Bilyonaryo News Channel na "On Point", tinawan-duon ni Garbin an kamugtakan kan relasyon ni Co sa partido. “To tell you honestly, Pinky, when he filed his resignation, he also cut any communications from us, from the group,”  an sabi niya, siring man an pag-resign kaini asin an pagputol nin kontak.

Sa totoo lang mismong hale sa ngimot ni Garbin an pag admitir na an kontrobersyang ini nagtao nin danyos sa reputasyon kan Ako Bicol. Sa ngunyan, napapaatubang an partido sa negatibong hiling kan publiko mantang minaluwas an mga detalye kan mga pigtutubudang anomalya kasabay kan manhunt ki Co.

Para sa mga Bicolanong miyembro kan party-list, nagtao ini nin grabeng gabat. Sinabi ni Garbin na kaipuhan nindang ipaliwanag sa mga konstituente na an mga aksyon ni Co personal niyang gibo, asin bako daa so boot ining rason para madamay an prinsipyo o operasyon kan bilog na partido.

Malinaw na nasa tahaw ngunyan nin grabeng krisis sa kredibilidad an Ako Bicol Party-list. huli sa mga seryosong akusasyon tumang sa saindang dating lider na si Elizaldy Co. Maski ngani grabe an palinig kan partido na isiblag an saindang pangaran asin sabihon na "personal na gibo" sana ini ni Co, dai maitatago na an reputasyon kan bilog na organisasyon nadamay na sa mata kan publiko. 

An paghali ni Co sa nasyon bago pa magputok an isyu asin an biglaan niyang pagputol nin komunikasyon nagtatao nin pagduda asin dagdag na gabat sa mga nawalat sa Partylist urog na ni Garbin. Dai na madadara sa mga paliwanag o press release an grabeng mantsang ini, pananagutan an hinahanap kan mga Bicolano.

Sa sakuyang paghurop hurop kan nasabing isyu, tanganing maibalik an tiwala kan banwaan, dapat na gibuhon kan Ako Bicol an mga minasunod:

Enot, dai dapat sinda magpundo sa pag-disown o pagsuway ki Co, dapat sindang magsagibo nin internal na audit sa mga proyekto kan partido tanganing mapatunayan na mayo nang ibang opisyal na imbwelto sa siring na anomalya.

Pangaduwa, dapat sindang magtabang nin aktibo sa mga ahensya kan gobyerno sa paghahanap ki Co asin sa imbestigasyon tanganing ipahiling na sinda kaisa sa paghanap nin hustisya asin bakong kakampi sa korapsyon. An hapot kaya daw ni Garbin asin kan saiyang partido na ipagkanulo an saindang boss?

Pangtulo, dapat ipagpadagos an direktang pakikipag-olay sa saindang mga konstituente, magkaigwa nin mga "town hall meetings" o direktang konsultasyon sa mga banwaan sa Bicol tanganing talingkas na masimbag an mga hapot kan publiko asin mapatunayan na an prinsipyo kan partido para sa rehiyon iyo pa man nanggad an nanginginot, bako an pansadiring interes nin sarong indibidwal.

Pang apat, Itunong kan Ako Bicol an pakipag iwal lalo sa saindang mga kritiko asin dae pagdagdagan an mantsa kan saindang grupo taliwas sa saindang pinagigibo, an pakiiwal sa mga kritiko sarong taktika nin sarong tawong igwa nin itinatago. Kun malinig an saindang konsensya, talingkas nindang bubuksan an saindang mga libro para sa audit o lifestyle check.

Balikan ko an sakuyang hapot, kamo daw mga ka duon an sumimbag. Kaya daw nindang ipagkanulo an saindang 'boss'" para sa hustisya, o sadyang naglilinig sana sinda nin bado tanganing makaligtas sa masunod na eleksyon?

Bukas man an Simpleng Duon sa ano man na komento kan mga tawong nabanggit. Pwedeng mag-email sa bicolnettv@gmail.com para sa mga kahapotan asin ano man na klase nin paglilinaw.

                                  ###