Legasiya ni Rep. Edcel Lagman: Sarong Pagsaludo sa ‘Superman’ kan Lehislatura asin Deretsos Humanos

Legasiya ni Rep. Edcel Lagman: Sarong Pagsaludo sa ‘Superman’ kan Lehislatura asin Deretsos Humanos

TABACO CITY – Sa pagkomemorar kan sarong taon na pagkagadan ni dating Albay 1st District Congressman Edcel Lagman, ipinangaran sa kongresista an 3-storey building sa Ziga Memorial Hospital na kun sain siya an nagin dahilan asin guminibu nin paagi ta ngane nang maitugdok an nasabing edipisyo.

Sa paagi kan Executive Order # NER-02 kan nakatukaw na Gobernador na si Noel Rosal naipangaran an 3-storey building sa nasabing hospital asin ngunyan inaapod na ining Cong. Edcel C. Lagman Building.

Sa pagkagadan kan beteranong kongresista nag-walat ini nin dakulang luha asin hararom na marka sa history kan Albay. Midbid bilang saro sa pinakamatalas na isip sa Kongreso an nasabing representante, nagmarka an saiyang 29 na taon na pagsirbi bilang kongresista nin mga ley na nagpabago sa buhay kan milyon-milyon na Pilipino. Bako sana siyang boses kan saiyang mga kahimanwa sa Tabaco, asin kataraid na banwaan, kundi saro man na matibay na harigi nin demokrasya sa bilog na nasyon.

Saro sa pinakaprominenteng naginibuhan ni Lagman iyo an pagtulod kan Reproductive Health Act (RA 10354), sarong ley na nagtao nin oportunidad sa mga kababaihan asin pamilya na magkaigwa nin kontrol sa saindang salud asin kinabukasan. Dai man malilingawan an saiyang panginot na papel sa pagpundo kan Death Penalty sa Pilipinas kan 2006. An saiyang mga adbokasiya nagpapatunay kan saiyang matinding pagrespeto sa buhay asin an pagtubod na an katanusan dapat pirming may kaibang pagpatawad asin rehabilitasyon.

Bilang tunay na "Human Rights Champion," pinunan man ni Lagman an mga ley para sa mga biktima kan Martial Law paagi kan Human Rights Victims Reparation and Recognition Act. Pinanginutan man niya an pagpanday kan mga ley para sa libreng edukasyon sa hayskul (Free High School Education Act) asin an Comprehensive Agrarian Reform Law (CARP) na nagtabang sa mga parauma. An saiyang husay sa paggibo nin ley bako sanang pang-papel, kundi nagtataong kusog asin proteksyon sa mga nasa laylayan kan sosyedad.

Dawa sa saiyang huring mga taon bilang Presidente kan Liberal Party asin lider kan oposisyon, dai nagluya an panindugan ni Lagman kontra sa korapsyon asin abuso sa poder. An saiyang pagigin boses kan "Magnificent 7" sa Kamara an nagserbing liwanag sa tahaw kan mga kritikal na isyu sa pulitika. Para sa mga Albayano, siya an "Intellectual Giant" na nagdara nin dakulang onra sa probinsya sa paagi nin matanos, de-kalidad, asin prinsipadong paglingkod sa laog nin pirang dekada.

Sa pagkagadan ni Kongresista Lagman, nawaran an Bicol nin saro sa pinakamaliwanag na bintana sa nasyunal na gobyerno. Alagad, an saiyang mga tinogdas na ley—puon sa RH Law sagkod sa pagprotektar sa mga nawawaran nin mahal sa buhay (Anti-Enforced Disappearance Act)—an magdadanay na giya para sa mga masurunod na henerasyon nin mga lider. An bilog na Albay nagpaabot nin pagsaludo sa sarong tunay na tagapaglingkod kan katanusan asin katalingkasan.

###

| Nel Adtoon, Simpleng Duon, Bicol Net TV

maestroneladtoon@gmail.com 

#SimplengDuon

#SimplengAksyon

#BicolNetTV

#BicolNews

#BaretangBicol