Renovasyon nin mga Classroom sa Magapo ES, Inilunsad sa Ika-enot na Death Anniversary ni Late Cong. Edcel Lagman

- January 31, 2026

TABACO CITY – Pormal na inilunsad kasuudma an inisyatiba sa pagpakaray kan mga classroom sa Magapo Elementary School bilang pagromdom sa ika-enot na taon nin pagkagadan kan dating Congressman Edcel Lagman. An bilog na komunidad kan eskwelahan, sa panginginot ni School Principal Maria Cecilia Borjal, nagpaabot nin hararom na pasalamat sa pamilya Lagman huli sa saindang daing sawang pagsuporta sa edukasyon, na naging sentro kan aktibidad sa tahaw kan pagromdom sa legasiya kan saindang ama.

Sa irarom kan nasambit na proyekto, an lambang saro sa magturugang na Lagman nag-adoptar nin sarong classroom tanganing irenovar asin gibuhon na mas pabor o "conducive for learning" para sa mga estudyante. Ining pambihirang lakdang mapapakinabangan kan siyam (9) na temporary learning spaces (TLS) kan Magapo ES. Sa paagi kaini, masiseguro na maski sa pansamantalang pasilidad, igwa nin komportable asin ligtas na lugar an mga aki na makakatabang sa saindang mas madaling pag-intindi sa mga leksyon.

Nagin prayoridad an nasambit na renovasyon huli sa sitwasyon kan eskwelahan na sa ngunyan naka-evacuate dara kan pag-alburuto kan Bulkang Mayon. Nin huli ta temporaryo sana an mga pasilidad sa evacuation area, dakula an nagin pangangaipo na mapakaray an kamugtakan kaini tanganing dai mahale an "focus" kan mga estudyante sa tahaw kan kalamidad. An pamilya Lagman nagin simbag sa pangangaipong ini, na nagpapatunay na an serbisyo publiko mayo nin pinipiling panahon.

Ipinahayag ni Principal Maria Cecilia Borjal na an aktibidad na ini bako sanang simpleng konstruksyon kundi sarong buhay na pag-onra sa legasiya kan dating Kongresista. "An paglunsad kaining proyekto kasabay kan death anniversary ni Former Congressman Edcel Lagman sarong patunay kan saindang pagpadangat sa satuyang banwaan. Dakulang inspirasyon ini para sa samuyang mga estudyante na mahiling na an edukasyon nagdadanay na prayoridad sa ibong kan anuman na kasakitan," an saiyang pahayag.

Sa paagi kan proyektong ini, an legasiya kan dating Kongresista padagos na mabubuhay sa puso kan mga taga-Magapo. Imbes na mamundo sana sa saiyang pagkawara, pinili kan pamilya Lagman na itao an saindang kusog sa pagtabang sa mga kaakian, na naggagarantiya na an kinabukasan kan Magapo ES magdadanay na maliwanag asin matanos sa ibong kan anuman na banta kan bulkan.